Gwahoddir ffermwyr o bob rhan o Gymru i ymuno â busnes ffermio arloesol a Hybu Cig Cymru (HCC) ar gyfer gweithdy Grasscheck arbennig.
Cynhelir y gweithdy ddydd Iau 22 Chwefror 2024 ym Mhenmaen Bach ger Machynlleth, lle mae Richard Rees a’i frawd Huw Llyr yn rhedeg fferm 90 hectar, ac yn pori diadell o 400 o famogiaid croes Aberfield sy’n cael hyrddod Abermax.
Ers dwy flynedd, mae’r fferm wedi bod yn rhan o fenter Grasscheck GB sydd wedi darparu data a chymorth amhrisiadwy i’r busnes. Nod y teulu yw pesgi’r holl ŵyn oddi ar borfa ar system bori cylchdro sydd hefyd yn cynnwys sicori a maglys. Mae'r fferm yn ceisio cadw costau mor isel â phosib drwy roi pwyslais ar gynhyrchu porfa a defnyddio gwreiddlysiau yn y gaeaf.
Yn ymuno â’r gweithdy bydd yr ymgynghorydd Andy King a fydd yn rhannu dadansoddiad o ddata pori’r fferm y tymor hwn ac yn esbonio sut mae’r data’n helpu wrth wneud penderfyniadau.
Dywedodd Pennaeth Cynaliadwyedd a Pholisi’r Dyfodol yn HCC, Rachael Madeley-Davies: “Mae’r hyn a wnaed eisoes yma ym Mhenmaen Bach yn rhoi syniad da iawn o’r hyn y gallwn ei gyflawni os cymerwn fantais lawn o’r data. Rhaid i’n diwydiant a’n harferion ffermio esblygu os ydym am aros ar y blaen ac arwain y ffordd o ran cael busnesau fferm arloesol, cynaliadwy a phroffidiol. Byddwn yn annog unrhyw un sy’n tyfu’r adnodd gwerthfawr hwn i ymuno â’r diwrnod gwybodaeth a dysgu am y prosiect a’r manteision y gall eu rhoi i’w menter ffermio eu hunain.”
Archebwch eich lle yma: https://bit.ly/3RYvPcs
